Follow by Email

புதன், 8 ஏப்ரல், 2015

ஒரு நாள் கூத்துக்கு ...


                       வழக்கம் போல ஞாயிற்றுக் கிழமைகளில் எங்காவது வெளியே கிளம்பினால் வீட்டில் எதாவது வாங்கிவரச் சொல்வது வழக்கம் .இன்று முடிதிருத்தம் செல்லப் போகிறேன் என்று சொன்னததுதான் மாத்திரம், கும்பிட வேண்டாத தெய்வம் குறுக்கே வந்தது போல ரேசன் கடையில் சர்க்கரைக் கோதுமை எண்ணெய் என்று வாங்க வேண்டிய  பட்டியலோடு முன்னாடி நின்று விட்டார் எனது இல்லத்தரசி. அது மட்டுமல்ல இன்று கூட்டம் எதுவும் இருக்காது உடனே வாங்கி விடலாம் என்று அந்தத் தண்டனையில் சலுகை வேறு ! பையன் பரிதாபமாகப் என்னை பார்த்தான் .அம்மாவை எதிர்த்து, அப்பாவின் வெற்றியை ஒரு நாளாவது பார்க்க வேண்டும் என்பது போல இருந்தது அது ! அவனுக்கு என்னை விட Bad Luck !.

ரேசன் கடை என்றாலே எனக்கு லேசாய் ஒரு வித அயற்சி மனசுக்குள் வரும் .சின்ன வயது முதலே திண்டுக்கல் ரேசன் கடை வரிசை எனக்குச் சலிப்பைத் தரும் வீட்டில் சின்னப் பையன் என்பதால் எனக்கே வரிசையில் நிற்கும் பதவி வழங்கப்படும்.ஒரு முறை நான் எதனாலோ போக வில்லை அன்று ( நான்கு பேரில் ) பெரிய அண்ணன் போய் இருந்தார் அவர் கோபக்காரர்.வாடகை டாக்சி ஓட்டுபவர் .கடையில் மிகப் பெரிய மண்ணெண்ணெய் வாங்கும் வரிசையில் யாரோ இடையில் தனது கடைக்காரருடன் இருந்த செல்வாக்கைப் பயன் படுத்தி முன் சென்று வாங்க , இவர் கேட்கச் சண்டை வந்து விட்டது .நியாய விலைக் கடைக்காரர் அநியாயமாகக் குறுக்கே வந்தவருக்குச் சிபாரிசு செய்ய , மண்ணெண்ணெய் வாங்காமல் விட்டுக்குச் சண்டயில் கிழிந்தச் சட்டையை மாற்ற வந்தவரை அழைத்துக் கொண்டு மற்ற அண்ணன்கள் போய்க் குறுக்கே வந்தவரைக் குடும்பத்தோடு அடித்துக் குவித்து விட்டார்கள்.தடுக்க வந்த கடைக்காரருக்கும் சில தரும அடிகள் வழங்கப்பட்டது.அன்றிலிருந்து வீட்டில் யார் ரேசன் வாங்கப் போனாலும் வரிசையில் நின்றாலும் உடனே கூப்பிட்டு எடைச் சுத்தமாக ,( நிறுவைத் தட்டை அழுத்தாமல் ) வழங்கி அனுப்பி விடுவார்கள் ! ஒரு வேளை அந்த ரேசன் கடைக் கல்வெட்டில் எங்கள் பெயரைப் பதிவுச் செய்துவிட்டார்களோ என்னவோ ?



          ஆஃபிசுக்குப் போகும் வழியில் ரேசன் கடை இருப்பதால் மனைவியை இறக்கி விட்டுச் செல்வது வழக்கம் உள்ளே போனதில்லை.எனக்கும் முன் இரண்டு பேர் இருந்தனர். ரேசன் கடை என்பதை விட அதை ரேசன் கொடவுன் என்று சொல்லிச் சந்தோசப்பட்டுக் கொள்ளலாம் .எங்கும் பழைய சாக்கு மூடைகள் ,பிரிக்கப் படாத சர்க்கரை மூடையில் SSCSM ( Subramaniya Siva Coop.Sugar Mills Ltd.,Gopalapuram) என்று கொட்டை எழுத்து இருந்தது . மண்ணெண்ணெய் ட்ரம்கள்,அட்டைப் பெட்டிகள் என அந்த இடத்தின் இறுக்கத்தை அதிகப்படுத்திக் கொண்டு இருந்தன.சர்க்கரை ஆஸ்பெஸ்ட்டாஸ் கூரை .அதை மறைக்க வைத்த அட்டை, சண்டையில் கிழிந்தச் சட்டை போல அக்கு வேறாக (அடித்த) ஆணி வேறாகத் தொங்கிக் கொண்டு தனது கடமையைச் சிறிது செய்யாததால் வெப்பத்தின் கதிர்கள் ஆஸ்பெஸ்டாஸ் வழியே வெளியேரும் போது கோபமாக மாறி உடம்பின் வியர்வைச் சுரப்பிகளுக்குத் தீபாவளிக் கொண்டாட்டத்தைத் துவக்கி வைக்கத் தொடங்கியது .அந்த ரேசன் கொடவுனுகுக்குள் விலையில்லா இலவச மின் விசிறி கூட இல்லை .சுவர் முழுவதும் சாமி ஆங்காங்கே விநாயகர் ,முருகன் ,இயேசு என எல்லோரும் இருந்தனர்.அவைகள் அனேகமாகப் பல தீர்ந்து போன சாமிப் படக் காலண்டர்ப் படங்கள் .பல இடத்தில் இயேசு தனது இருதயத்தைத் திறந்து வைத்து இருந்தார் .அவர் நெற்றியில் சந்தனமும் குங்குமமும் வைத்து யேசுவையே மதம் மாற்ற முயற்சி செய்து இருந்தார்கள் அங்கே ! .


                உள்ளே ஒரு பணியாளார் மட்டுமே இருந்தார் அவரே பில் போட்டார் .அவரே வழங்கலும் .எனக்கு முன் இருந்தவரின் கார்டில் பில் போடும்போது அதற்கு முந்திய மாத பதிவில் பச்சரிசி வாங்காத இடம் நிரப்பாமால் இருந்ததை, வாங்கியதாகப் பதிவு செய்தார் .அதைப் பார்த்து அந்தக் குடும்ப அட்டைதாரர் எதர்க்கு அதைப் பதிவு செய்கிறீர்கள் என்று கேட்டார் .(அவர் புதிதாய்க் கடைக்கு வருபவர் போல ? ) .அதற்கு ஓர் அற்புதமான பதில் தந்தாரே பார்க்கலாம் கடைப் பணியாளர்.நீங்கள் கட்டாயம் வாங்க வேண்டும் இல்லாவிட்டால் பதிவு செய்ய வேண்டும் என்றார் .நாம் உயிரோடு இருக்கும் பொதே நம் ஓட்டை யாரோ போடும்போது போன மாதம் வாங்காத பச்சரிசி மூட்டை ,நாம் வரும் வரைக்கும்  குத்த வைத்தா உட்கார்ந்து இருக்கும் ?

                 எனக்குப் பில் போடும்போது நான் கேட்டதை விட ஒரு பொருள் கூட இருந்தது.கேட்டதர்க்கு ’டீத்தூள்’ என்றார் .கட்டாயத் திணிப்பு.மானியச் சிலிண்டர் வீட்டுக்குக் கொண்டு வந்து தரும்போது `சம்திங்` போகக் கட்டாயம் வேறு ஏதோ ஒரு பொருள் வாங்க வேண்டுமே அது போல ! இன்னும் எத்தனை முறை வேண்டுமானாலும் மக்களால், மக்களுக்காக, மக்களே தேர்ந்து எடுத்துக் கொள்ளும் மக்களாட்சி என்று நாம் கத்திக் கொண்டே போகலாம் யாருக்கென்ன போச்சு ? வாழ்க மக்களாட்சி .


            
              தொப்பலாக வியர்வையில் நனைந்து விடுதையாகி வெளியே  வந்தேன்.அப்போது தான் பார்த்தேன்  அதே காம்பவுண்டுக்குள் ரேசன் கடைக்கு நேரெதிரே டாஸ்மாக் கடை இருந்தது.காலைப் பத்து மணிக்கும் கனிசமான கூட்டத்திர்க்குக் குறைவில்லை.ஒரு வேளை என்னைப் போல ரேசன் கடைக்கு வந்தவர்கள் மக்களாட்சி மேல் கோபம் வந்து, குடிக்கப் போய் விட்டார்களோ ? இருக்கலாம் ! சரி எப்படியும் யாரோ சிலருக்கு இது கூட லாபம்தானே ? 

வியாழன், 2 ஏப்ரல், 2015

பாட்டியின் பிரார்த்தனை .


எல்லோரு வீட்டிலும் மகன் களோ மகள்களோ எப்படி வர வேண்டும் என்ற பாட்டிமார்களுக்குக் கனவு இருக்கோ இல்லையோ பேரன் பேத்திமார்கள் இப்படித்தான்  வரவேண்டும் என்ற கனவை சுலபமாக விதைத்து விடுகிறார்கள். அவர்கள் டாக்டர் ,வக்கீல் தவிர அவர்கள் கனவு அதிகார வர்கத்தில் சில சமயம் வேறு யாரும் வருவதில்லை . அப்படியே வந்தாலும் அது கவர்மெண்ட் வேலையாக இருக்கும் இன்றைய பாட்டிமார்களுக்கு அப்படிக் கனவு குறைந்து வரக் காரணம் இப்போதைய படிப்புகள் எதுவும் புரிவதில்லை என்பது கூட இருக்கலாம்.அல்லது நாடக தொடர்கள் அதை யோசிக்க விடாமல் நிரப்பி இருக்கலாம் ! அதெல்லாம் கூட ஒத்துக் கொள்ளலாம் .ஆனால் அவர்கள் நம் நலனுக்காகச் சமயபுரம் மொட்டை திருப்பதி மொட்டை ,இங்க பால்குடம் எடுக்கிறேன் , அங்க அக்னிச் சட்டி எடுக்கிறேன் என்று வேண்டிக் கொள்கிறார்களே அதை எதில் சேத்திக் கொள்வது ? தெரியவில்லை .


என்னோட பாட்டி (அப்பாவின் அம்மா ) தாத்தாவை அனுப்பிவிட்டு போகும் முன் எனக்காக அம்மை பார்த்த போது அது நீங்க , திண்டுக்கல் கோட்டை மாரியம்மனுக்கு அக்னிச் சட்டி எடுப்பதாக வேண்டிக் கொண்ட சில வருடங்களில் தாத்தாவை பார்க்க கிளம்பிவிட்டார் .அவர் உயிரோடு இருக்கும் வரை அந்த மகமாயிடம் ,  என் வேண்டுதல் நிறவேற்றும் தன் கை கால் சுகம் தர வேண்டும் என்று வேண்டிக் கொள்வார் பாட்டி . பல வருடம் இப்படி ஏமாற்றித் தனது ஆயுளை தள்ளிப் போட பார்த்து இருக்கிறார் .மனிதனுக்கே கொடுத்த கடன் திருப்பித் தரவில்லை என்றால் கோபம் வரும். கடவுளுக்குச் சொல்லவும் வேண்டுமா ?

          சில நாளாய் எங்கேயும் என்னை விட்டு வெகு தூரம் போகாதே என்று புலம்பி கொண்டே இருப்பார். .ஒருநாள் நத்தம் பக்கத்தில் புதிதாய் திருமணம்    ஆன நண்பர் தங்கையின் மாப்பிள்ளை வீட்டுக்குக் கட்டில் பீரோ கொண்டு போய் இறக்கிக் கொண்டு இருந்தோம்.பின்னாலேயே நண்பரின் தம்பி வந்து விசயம் சொன்னான் .எனக்கு விவரம் தெரிந்த பிறகு வீட்டில் சந்திக்கும் முதல் மரணம் அது.எப்படி நடந்து கொள்ள வேண்டும் என்பது கூடத் தெரியவில்லை .வீட்டுக்கு வந்தோம் .முதல் அறையில் பாட்டியின் உடல் கிடத்தப் பட்டு இருந்த்து .தலை மாட்டில் ஒரு லட்சுமி விளக்கு மெல்லிய சுடருடன் காற்றில் அசைந்து கொண்டு இருந்தது. உயிர் பிரிந்து வெகு நேரம் கழித்துப் பார்த்ததால் கை கால் விறைத்த நிலையில் , கால் நீட்டி படுக்க வைக்க ஏதுவாக இல்லாமல் , உட்கார்ந்த மாதிரி இருந்தது பாட்டி உடல் .ஆனால் கை மட்டும் பிரிக்க முடியாமல் எதையோ கடவுளிடம் வேண்டிக் கொள்வது போல ’கைகூப்பிய’ நிலையில் இருந்தது.

 

                      பாட்டி இறந்த முதல் வருடம் முடிந்த கையோடு அவர் யாருக்காக வேண்டினாரோ அவர்தான் அந்த வேண்டுதலை நிறைவேற்ற வேண்டும் என்பதை .அம்மா சொல்ல .நான் முடியாது என்றேன்.வழக்கம் போல அப்பா முறைத்துப் பார்த்தார்.ஒத்துக் கொள்வதைத் தவிர வேறு வழி? அப்படி நான் தயங்க இரண்டு பெரிய காரணம் இருக்கிறது .பாட்டி வேண்டிக் கொண்ட கோட்டை மாரியம்மன் கோவில்பின்புறம்தான் நான் +2 வரை படித்த பள்ளி.அங்கு வருபவர்கள் சாமி வந்து ஆடுவதைப் பார்த்து பயங்கலந்த கேளியாய் நினைத்து இருக்கிறேன் .இன்னொன்று அந்த அக்னி சட்டி எடுக்கும்போது சட்டை போட கூடாது .நான் குளிக்கும் போது தவிரச் சட்டை போடாமல் இருந்ததே இல்லை .அதிலும் கேரளா ,கன்னியாகுமாரி கோவில்களுக்குள் சட்டை போடாமல போகக் கூடாது என்பதால் இது வரை அங்குப் போயும் , உள்ளே போனதில்லை .கூச்சமே எனது பாதுகாப்பு என்று ( சத்திய சோதனையில் ) சொன்ன காந்தியடிகளூக்கும் எனக்கும் உள்ள ஒரே ஒற்றுமை அதுதான் .ஆனால் அப்பாவின் முறைப்புக்கு முன்னால் இந்தக் கசப்பு மருந்து ஒரு பொருட்டல்ல .ஆனால் திண்டுக்கல் மணிக்கூண்டு வெள்ளை விநாயகர் கோவிலிருந்து கோட்டைமாரியம்மன் கோவில் வரை யாரெல்லாம் என் சட்டையில்லாத உடம்பை பார்ப்பார்களோ ?
 
விரதம் ,தலைமாட்டில் தினமும் வேப்பிலைக் கொத்து, காலை

மாலை குளியல் டி.வி பார்க்கவும் சினிமா பார்க்கவும் தடை .ஓர் இளைஞனுக்குத் தரக் கூடாத தண்டனைகள் வரிசை கட்டி அடித்தன.எல்லாம் பொருத்து பூமியாண்ட பின் அந்த அக்னிச்சட்டித் திருநாள் வந்தது .என்னுடன் அண்ணியும் எடுத்தார்கள் .அவர்கள் கையில் நிறைய வேப்பிலை பரப்பி அதன் மேல் அக்னி வளர்த்த சட்டியை வைத்தார்கள் .நான் வேண்டாம் என்றேன் .என் பக்தி உண்மையாய் இருந்தால் கைகள் வெப்பத்தால் பாதிக்கக் கூடாது என்று கடவுளுக்குச் சோதனை வைத்தேன் .அந்த வயசுக்குரிய பிடிவாதம்.கோவிலுக்குள் சென்று உள் பிராவகம் சுற்றும் வரை கை சுடவில்லை கடவுள் பாஸ் ஆகிவிட்டார்.ஆனால் கடவுளுக்குப் பரிட்சை வைத்ததால் என் மேல் கோபம் போல ! பின்னால் வந்த அண்ணியின் அக்னி சட்டி ஓர் இடத்தில் உள் பிராவகம் சுற்றி வரும்போது கூட்டத்தில் தடுமாறி சமாளிக்க முடியாமல் என் இடது பின் தோலை நல்ல வெப்பத்தோடு பதம் பார்த்து விட்டது .

               அப்போதுதான் அந்த ஒரு விசயம் நடந்தது.யாரோ ஓர் இளம் பெண் வேண்டுதல் போல ! என் காலுக்குப் பாத பூஜை செய்வது போலத் தண்ணீர் ஊற்றினார் கடவுளே இதென்ன சோதனை என்று உரக்க மனசு கூவியது .இந்த வேண்டுதலில் எனக்கு வேண்டிய பாட்டியின் கடன் அடைத்து விட்டேன் .அதை மீறி எனக்கு எதாவது ஒரு நன்மை நடக்க இருந்தால் இதோ இந்தப் பெண்ணுக்குச் செய்து விடு என்று கோட்டை மாரியம்மனை கண்ணீர் மல்க வேண்டிக் கொண்டேன் .